THE REPUBLIC OF THE UNION OF MYANMAR

MINISTRY OF INDUSTRY


မြန်မာ့ဆေးဝါးလုပ်ငန်း


Fri 09-02-2024

-

နောက်ခံသမိုင်း

    မြန်မာ့ဆေးဝါးလုပ်ငန်းသည် စက်မှုဝန်ကြီးဌာနရှိ စက်မှုလုပ်ငန်း(၄)ခုအနက် ဆေးဝါး ထုတ်လုပ်မှု လုပ်ငန်းကို အဓိကဆောင်ရွက်နေသော လုပ်ငန်း(၁)ခုဖြစ်ပါသည်။ နိုင်ငံပိုင်ဆေးဝါးစက်ရုံများမှ ပြည်တွင်းလိုအပ်ချက်ရှိသော ဆေးဝါးအမျိုးအစားပေါင်း(၂၀၀)ကျော်ကို ထုတ်လုပ်ပေးလျက်ရှိပြီး စားသောက်ကုန်နှင့် အိမ်သုံးပစ္စည်းစက်ရုံများကိုလည်းပုဂ္ဂလိကနှင့် ငှားရမ်း/ဖက်စပ် ဆောင်ရွက်လျက် ရှိပါသည်။
    ဆေးဝါးနှင့်အိမ်သုံးပစ္စည်းလုပ်ငန်းကော်ပိုရေးရှင်းနှင့် စားသောက်ကုန်လုပ်ငန်းကော်ပို ရေးရှင်း တို့ကို ၁၉၇၂ ခုနှစ်တွင် စတင်တည်ထောင်ခဲ့ပြီး ၁၉၈၉ ခုနှစ်နောက်ပိုင်းတွင် စျေးကွက် စီးပွားရေးစနစ်အရ မြန်မာ့ဆေးဝါးနှင့်အိမ်သုံးပစ္စည်းလုပ်ငန်း နှင့် မြန်မာ့စားသောက်ကုန်လုပ်ငန်း အမည်တို့ဖြင့် အသီးသီး ဖွဲ့စည်းဆောင်ရွက်ခဲ့ပါသည်။ (၁-၈-၂၀၁၀)ရက်နေ့တွင် မြန်မာ့ဆေးဝါးနှင့်အိမ်သုံးပစ္စည်းလုပ်ငန်းနှင့် မြန်မာ့စားသောက်ကုန်လုပ်ငန်း တို့ကို ပေါင်းစည်း၍ မြန်မာ့ဆေးဝါးနှင့်စားသောက်ကုန်လုပ်ငန်း အဖြစ် ပြင်ဆင် ဖွဲ့စည်းခဲ့ပါသည်။
    ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတရုံး၏ ၂-၁၂-၂၀၁၁ ရက်စွဲပါ အမိန့်ကြော်ငြာစာအမှတ်၊ ၉၅/၂၀၁၁ အရ အမှတ်(၁)စက်မှုဝန်ကြီးဌာနနှင့် အမှတ်(၂)စက်မှုဝန်ကြီးဌာနတို့အား စက်မှုဝန်ကြီးဌာန အဖြစ် ပြင်ဆင်ဖွဲ့စည်းခဲ့ရာတွင် ဆေးဝါးနှင့်စားသောက်ကုန်လုပ်ငန်းအဖြစ် ပါဝင်ခဲ့ပါသည်။
    စက်မှုဝန်ကြီးဌာန၏ ဖွဲ့စည်းပုံကို ၂၅-၃-၂၀၁၅ ရက်နေ့တွင် ကျင်းပပြုလုပ်သော ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၇/၂၀၁၅) မှ သဘောတူခွင့်ပြုချက်အရ ၁-၄-၂၀၁၅ ရက်နေ့မှစ၍ ပြင်ဆင်ဖွဲ့စည်းခဲ့ရာတွင် မြန်မာ့ဆေးဝါးလုပ်ငန်း အဖြစ် ပြောင်းလဲသတ်မှတ်ခဲ့ပြီး ယနေ့တိုင်ဆောင်ရွက်လျက်ရှိပါသည်။

မြန်မာ့ဆေးဝါးလုပ်ငန်းရှိ စက်ရုံများ    

    (က)    ဆေးဝါးစက်ရုံ(အင်းစိန်)
    (ခ)    ဆေးဝါးစက်ရုံခွဲ(ရွာသာကြီး)
    (ဂ)    ဆေးဝါးစက်ရုံ(အင်ရောင်း)
    (ဃ)    မြင်းနှင့်သိုးမွေးမြူရေးစခန်း(ဟဲဟိုး)
    (င)    ဆပ်ပြာစက်ရုံ(မန္တလေး)



Top