အသေးစားနှင့်အလတ်စားလုပ်ငန်းရှင်များအား JICA မှ ငွေကျပ်ဘီလီယံ ၃ဝ ချေးမည်

ရန်ကုန် သြဂုတ် ၁၄

ငွေကြေးအရင်းအနှီး အခက်အခဲရှိနေသော အသေးစားနှင့်အလတ်စား စီးပွားရေးလုပ်ငန်းရှင်များအား မြန်မာနိုင်ငံနှင့် ဂျပန်နိုင်ငံတို့၏ အစိုးရအချင်းချင်း G to G အစီအစဉ်အရ JICA မှSME Two Step Loan အစီအစဉ်ဖြင့် ဂျပန်ယန်းငွေသုံးဘီလီယံ (မြန်မာငွေကျပ် ၃ဝ ဘီလီယံ)ကို အတိုးနှုန်းသက်သာစွာဖြင့် ထုတ်ချေးပေးသွားမည်ဖြစ်ကြောင်း လှိုင်တက္ကသိုလ်နယ်မြေ မြန်မာနိုင်ငံအင်ဂျင်နီယာအသင်း၌ ကျင်းပသောSME ဘဏ္ဍာရေးဆိုင်ရာ ဖွံ့ဖြိုးတိုးတက်မှု အလားအလာကောင်းများဆီသို့ အသိပညာပေးဆွေးနွေးပွဲ အခမ်းအနားမှ သိရသည်။

အဆိုပါအခမ်းအနားသို့ စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချို တက်ရောက် အမှာစကားပြောကြားရာတွင် အစိုးရသစ်အနေဖြင့် အသေးစားနှင့်အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးအတွက် ချေးငွေများ ထုတ်ပေးလျက်ရှိသော်လည်း လိုအပ်ချက်များ ရှိနေသေးကြောင်း၊ အရည်အသွေးမီထုတ်ကုန်များ ဈေးနှုန်းသက်သာစွာဖြင့် ထုတ်လုပ်စေလိုကြောင်း၊ အသေးစားနှင့် အလတ်စားစီးပွားရေး လုပ်ငန်းများ ဖွံ့ဖြိုးတိုးတက်မှ အလုပ်အကိုင်အခွင့်အလမ်းများ တိုးတက်လာမည်ဖြစ်ကြောင်း စသည်ဖြင့် ပြောကြားသည်။

''ဂျပန်နိုင်ငံမှODAအထောက် အပံ့ရရှိတဲ့JICA Two-Step Loan မှာ CGI စနစ်ကိုအသုံးပြုပြီး ချေးငွေ ရရှိနိုင်ဖို့အတွက် လုပ်ငန်းရှင်တွေ ချေးငွေလျှောက်ထားရာမှာ လုပ်ဆောင်ရမယ့် အဆင့်တွေနဲ့ ပြင်ဆင်ထားရမယ့် အချက်တွေကို အသိပေးနိုင်ဖို့ ဒီကနေ့ အခမ်းအနားကို ကျင်းပပြုလုပ်ရခြင်းဖြစ် ပါတယ်။ ဒီစနစ်ကို အသုံးပြုပြီး ချေးငွေ ရယူလိုပါက Commercial Loan များထက် အတိုးနှုန်းသက်သာပြီး မြေနှင့် အဆောက်အအုံအပြင် အခြားသော ပစ္စည်းများကို အာမခံထားရှိနိုင်ခြင်းနှင့် အလားအလာကောင်းမွန်တဲ့ လုပ်ငန်း ဖြစ်ပါက အာမခံပစ္စည်းထက်ပိုမိုသော ချေးငွေများရရှိနိုင်သောကြောင့် လုပ်ငန်း ရှင်များအတွက် ပိုမိုထိရောက်မှုရှိမှာ ဖြစ်ပါတယ်''ဟု စက်မှုကြီးကြပ်ရေးနှင့် စစ်ဆေးရေးဦးစီးဌာန ညွှန်ကြားရေးမှူးချုပ် ဒေါ်အေးအေးဝင်းက ပြောကြားသည်။

အဆိုပါ ချေးငွေများကို ပြည်တွင်း ဘဏ်ခြောက်ခုဖြစ်သည့် APEX ၊ AYA ၊ CB ၊ Myanmar Citizens Bank ၊ KBZ နှင့်SMIDBဘဏ် တို့မှတစ်ဆင့် ထုတ်ချေးသွားမည်ဖြစ်ကြောင်း၊ ငွေချေးလိုသူSME လုပ်ငန်း ရှင်များအနေဖြင့် ယခုအချိန်မှစပြီး သက်ဆိုင်ရာဘဏ်များသို့ သွားရောက်ကာ ချေးငွေများလျှောက်ထားရမည် ဖြစ်ကြောင်း၊ မိမိနှစ်သက်သောဘဏ် တစ်ခုတည်း၌သာ လျှောက်ထားရမည် ဖြစ်ကြောင်း၊ စက်တင်ဘာလတွင် ဖောင် ပိတ်မည်ဖြစ်ပြီး အတိုးနှုန်းမှာ ၈ ဒသမ ၅ ရာခိုင်နှုန်းဖြစ်ကြောင်း၊ ကာလရှည် ချေးငွေအမြင့်ဆုံး ငါးနှစ်သက်တမ်းဖြစ်ကြောင်း၊ ဘဏ်တစ်ခုလျှင် ငွေကျပ် ငါးဘီလီယံအထိ ခွဲဝေပေးပြီး ငွေကျပ် ဘီလီယံ ၃ဝ ကို ဘဏ်ခြောက်ခုမှတစ်ဆင့် ထုတ်ချေးပေးသွားမည်ဖြစ်ကြောင်း သိရသည်။ 
သတင်း-မြင့်မောင်စိုး